Þ-listinn hefur nýlokið við að kynna framboð sitt til sveitarstjórnarkosninga í vor. Málefnavinnan er hafin og sú vinna er í fullum gangi. Boðið verður upp á opinn málefnafund á næstu vikum þar sem íbúum gefst kostur á að taka þátt í að móta stefnu og áherslur með frambjóðendum listans til næstu ára. Listinn hefur einnig komið upp heimasíðu þar sem koma má fram með hugmyndir og fyrirspurnir beint til frambjóðenda listans.
Þ-listinn vill leggja sitt af mörkum og finna fleiri leiðir sem hvetur ungt fólk til þátttöku og vekur áhuga þeirra til að hafa áhrif á framtíð sína, sem er rétt handan við hornið. Það er starfandi ungmennaráð í sveitarfélaginu og framboðið stefnir á að efla og auka samtalið á milli sveitarstjórnar og ungmennaráðsins, hljóti framboðið kjörgengi.
Þ-listinn hefur komið upp heimasíðu þar sem unga fólkið er hvatt til þess að koma á framfæri hugmyndum sínum varðandi betra samfélag fyrir alla í Bláskógabyggð. Með gagnvirkri heimasíðu og sýnileika á samfélagsmiðlinum Facebook reynum við að komast nær unga fólkinu í sveitarfélaginu.
