Er þetta (f)rétt?

Er hægt að treysta öllu sem maður sér á Tiktok? Í þessu stutta verkefni skoðum við staðhæfingar sem eru settar fram á samfélagsmiðlum og hvernig maður getur skoðað hvort þær séu sannar.

Verkefni - 30 mín

Athugið að með verkefninu fylgir stutt myndband og einfalt kennsluefni frá Blaðamannafélagi Íslands þar sem farið er yfir mikilvægi þess að leita sér upplýsinga á traustum fréttasíðum og hvernig sé hægt að koma auga á falsfréttir. Ekki er nauðsynlegt að nýta kennsluefnið til að leggja fyrir verkefnið en það gefur meiri dýpt.

Finna og hlaða niður myndbandi á Tiktok eða Instagram

Farðu í leitargluggan uppi í hægra horninu á Tiktok eða Instagram og leitaðu af myndbandi sem inniheldur upplýsingar um stjórnmál eða kosningarnar framundan. Má vera frá einstaklingi, samtökum eða stjórnmálaflokki. Leitarorð geta t.d. verið #alþingiskosningar, #stjórnmál, #kjósa, #húsnæðismál eða #flokkar.

Skrifaðu niður:

• Hverju er verið að halda fram í myndbandinu?

• Er vísað í einhverjar heimildir, eru hashtögg eða mentions?

• Hversu traustvekjandi er höfundur myndbandsins við fyrstu sýn? Heldurðu að hann sé að segja satt? Afhverju?

• Hefur höfundurinn einhverra annarra hagsmuna að gæta en að upplýsa kjósendur? Fær hann kannski borgað fyrir að birta efnið, vill hann fá atkvæðið þitt eða hafa áhrif á skoðun þína á ákveðnu málefni?

• Eru hlekkir á einhverjar vefsíður undir myndbandinu eða á prófælnum?

Sannreyndu upplýsingarnar

Hafa verið sagðar fréttir um það sem er staðhæft í myndbandinu?

• Leitaðu fyrst á google. Er eitthvað þar um málið?

• Ef ekkert kemur upp, prófaðu að fara inn á íslenska fréttasíðu, t.d. Vísir.is og athuga hvort hafi verið birt frétt um málið.

• Skrifaðu niður hvort þú finnir eitthvað meira um málið frá traustum fréttamiðli.

Niðurstöður

Skrifaðu niður:

• Hversu mikið traust berðu til höfundarins sem gerði Tiktok fréttina eftir nánari skoðun?

• Eru staðhæfingarnar sem settar eru fram líklegar til að vera réttar miðað við þína heimildarvinnu?